Tourengruppe
Aktive
Sektion
Tourenstatus
Durchgeführt
Datum
11.9.2020 - 12.9.2020 [Fr.-Sa.]
Anmeldung ab
16.08.2020
Anmeldeschluss
05.09.2020
TourenleiterIn
Stefanie Fuhrer
Tourencode
W, Trek/B/T3
Beschreibung

1. Tag: Abwechslungs- und aussichtsreiche Wanderung von Châtel-sur-Montsalvens dem Grat entlang zum Mont Bifé und weiter zum Vanil des Cours. Steiler Abstieg. Weiter durch das Waldreservat von Allières zur gleichnamigen Gîte.
T3, 5 Std., Aufstieg 1200m, Abstieg 590m

2. Tag: Kurzer Aufstieg zur La Berra. Herrliche Rundsicht. Auf schönem Höhenweg über La Platta zum Fuchses Schwyberg. Abstieg über den langen bewaldeten Rücken nach Schwand und hinunter an den Schwarzsee.
T2, 4,5 Std., Aufstieg 650m, Abstieg 1100m

Treffpunkt
Wird nach der Anmeldung mitgeteilt
Verkehrsmittel
ÖV
Reisekosten
ca. Fr. 43.00 Halbtax
Ausrüstung
Für Bergwanderungen mit Hüttenübernachtung, Picknick für 2 Tage, Sonnen- und Regenschutz, Stöcke empfohlen
Unterk.Kosten
Fr. 45.00 plus Abendessen/Getränke
Kosten
Teilnehmerbeitrag

Crète et Croupes Fribourgoises

Autor
Stefanie Fuhrer
Erstellt am
17.09.2020 7:53
Letzte Änderung
17.09.2020 7:53
Tourenbericht

Am Morge am 7ni hei sich üsi Toureleiterin Stefanie, d Erika, d Eva, dr Hannes u die Schriebendi am Bahnhof Thun troffe. Z Bärn is no d Rosette u dr Fritz derzue gstosse. Itz isch üsi fröhlechi Truppe komplett gsi u Richtig Fribourg u witer mitem Bus nach Châtel-sur-Montsalvens losgfahre. Im Restaurant de la Tour hets äs Startkafi u Gipfeli gäh.
Nachem luschtige Spruch u lutem Glächter bim zwägmache, si mir de grad veiechli stotzig obsigstartet. Mit jedem Schritt isch d Ussichet no schöner worde . U z Wätter het sich o vor beschte Site zeigt. Gli simer ufem Grat gsi u hei dr Höhewäg mit sine Uf- u Abstiege u grandioser Ussicht gnosse. Abwächslig hets auf der ganze Strecki gha:
Mutterchuehherde inklusive Muni zum Durchquere, ässbari u giftegi Beeri u Piuze u sogar e Matte mit viu Ankebäueli. E Höhepunkt isch dr Mont Bifé 1482 m gsi. Äs het sogar ä chlini Leitere vorem Gipfu gha. Dobe simer wäg de Platzverhäutnis froh gsi, das üsi Gruppe nid grösser isch.
Wo mir ufem nächschte Gipfu, Vanil des Cours 1562 m, si acho isch Punkt zwöufi gsi u Zyt zum Zmittag ässe. Die schwieregschti Entscheidig isch gsi, uf weli vo dene prachtvoue Site useluege. Äs isch glich spannend witer miteme stozige Abstieg u dür ds schöne Waldreservat vo Allières zur Gîte d'Allieres, üsere Ungerkunft. Mit jasse, prichte oder scho z Bett teschte, heimers gmüetlech gha. Äs wärschafts Znacht u e prächtige Sunneungergang hei dä schön Tag abgrundet.

Üsi Ungerkunft isch perfekt gsi, gross (24 Plätz für 7 Persone), suber, gueti sanitäri Alage inkl. Dusche. Aui hei guet gschlafe u si zfriede i nöi Tag gstartet. Nacheme richhautige Zmorge hei mir üsi Wanderig miteme Ufstieg zur la Berra 1719 m gstartet. La Berra isch äs Paradies für Wanderer, Biker u Wintersportler. D Panoramatafele si hiufrich gsi für d Orientierig vo dere gwautige Ussicht. Witer isches obsi u nidsi über Matte u dür Wäuder mit viu lüchtige Vogubeeri u Siuberdischtle. Bi La Platta 1616 m, wo zum Höhewäg Schwarzsee ghört, hei mir dr Mittagshaut gmacht. Guet gstärkt si mir munter witer zum Fuchses Schwyberg u hei zerscht mau zum Schwarzsee ache gseh. Itz hei mir no e schöne Abstieg überne länge bewaudete Rügge vor üs gha. Durschtig, gluschtig, müed u vorauem zfriede si mir bim Restaurnat Gypsera acho u hei no gnue Zyt gha zum ichehre.

Danke liebi Stefanie, hesch du üs e nöii u unbekannteri Gägend zeigt.

Rosmarie Muri, Thun

Um einen Bericht zu dieser Tour verfassen zu können musst du dich einloggen. Wenn du noch kein Benutzerkonto hast, musst du dir zuerst ein Benutzerkonto anlegen.