Schwarzenburg Schönetanne, Burgbachstäg, Steigle, Chrome, Mischlere, Schwarzwasserbrücke, Sense
Vorbei an schönen Höfen und mit toller Aussicht auf die Stockhornkette erreichen wir den Schwarzwassergraben. Vielleicht entdecken wir hier sogar einen Eisvogel.
Schwarzwasser-Sense-Schluchtenweg
Hüt hets früech Tagwach gäh für ame ne trüebe Tag. Trotzdäm si ds Thun am Bahnhof 12 zfriedni Jeudiste gsi. Ungerwägs in Seftige u Riggisbärg si no zwöi Wanderinne derzue cho. D Afahrt mitem Poschi zur Schönetanne in Schwarzeburg isch scho äs Erläbnis gsi. Mir hei d Chräche vo Rüschegg glert kenne u festgsteut, dass de z Gras u z Buecheloub no nid sowit isch wie bi üs.
Bir Schönetanne si mir munter Richtig Elisried los marschiert. Äs isch no troche gsi u mir hei d Stockhornchötti trotz Wulche chönne gseh. Mir si verbi bi schöne Burehöf, Fäuder mit Söiblueme u Veh wo gweidet het. Scho gli si de Wanderstöck zum Isatz cho. Äs isch veiechli nidsi zum Burgbachstäg u de grad ume obsi zum Krommen gange. Dert hets bime Hoflädeli Pouse mit Kafi u feine Spitzbuebe gäh.
Ir Zwüschezyt hets agfange ds rägne. Gsterkt si mir witer zum Bütschelbachstäg. Dä het grad chli Schärme bote u dr Erich het üs viu intressants über ds Schwarzwasser, die chauti u die warmi Sense, Saane u witer bis zur Nordsee verzeut. Mit Informatione rund um ds Wasser hei mir dsschöne, flache u ds grüene Schlussstück zur Schwarzwasserbrügg unger d Füess gno. Dert si mir no ga luege wie ds Schwarzwasser i d Sense fliesst.
Zum Abschluss vor Wanderig hets no ä Astieg zum Restaurant gäh. Dert hei mir üs uf dr grosse, deckte Terrasse no chönne verpflege bevor mir mitem Zug über Bärn heizue si. Äs isch o bi däm wächsuhafte u chüele Wätter ä wärtvoue Tag i gueter SAC Gseuschaft gsi.
Danke Erich für d Organisation u die guete Informatione.
Bis gli ufere nächschte Wanderig.
Kollegin Rosmarie Muri
Um einen Bericht zu dieser Tour verfassen zu können musst du dich einloggen. Wenn du noch kein Benutzerkonto hast, musst du dir zuerst ein Benutzerkonto anlegen.