Dr Aare naa

Usem Bus zwüsche Belp u Giessebad chöi mir no ä Rägeboge bewundere. Aber dr Wätterbricht für hüt gseht nid schlächt us.19 erwartigsvoue Jeudiste loufe mit mir zum nache Jägerheim zum Startkafi. I bi überrascht vom speditive u fründleche Service. Mir wärde sogar mit Bräzeli u Schoggieili verwöhnt. Auso dr Start isch glunge u mir chöi pünktlech starte. Ufem Wäg zwüsche Aare u Giesse gits viu Natur z bestuhne. D Bodenacherfähre bringt üs uf die rächti Aaresite. Witer geits richtig Dählhölzli. Dert müesse mir ä wäge Bouarbeite ä chline aber sehr schöne Umwäg i chouf näh. Usnahmswies chöi mir d Steiböck vo obe luege u fötele. Nachem Schönaustäg si mir überrascht wie viu Lüt i Badhose ungerwägs si. Im Marzilibad gniesse mir bi Sunneschyn u Ussicht uf d Aareschwümmer u z Bundeshus üses wouverdiente Picknick. Gsterkt göh mir witer zum Bärepark. Mir hei Glück, hüt isch d Björk dusse. Itz chunnt no ä chline Ufstieg zum Rosengarte. Dert wärde mir belohnt mitem Albert Einstein ufem Bänkli, dr Ussicht über Bärn u wunderschöne, farbige Bluemerabatte. Langsam setze mir zum Ändspurt a, ume a d Aare, übere Altenbergsteg u mitem letschte Ufstieg i d Stadt. Z Bärn isch d Bundesterrasse no Pflicht. U dert hei mir SACler no chönne i d Bärge luege. Dr Abschluss vo dere churzwilige Tour hei mir im "Hans im Glück" gmacht.
Ufem Heiwäg im Zug hani müedi u zfriedeni Gsichter gseh.
Öii Rosmarie Muri