Surenenpass

Mir si im Postauto nach Attinghausen. D Tagestemperatur leuchtet mit +35 Grad uf. Genau, mir hei die Schuhe mit Profil agleit, wo mir ou im Winter anne hei. Äbeso striche mir üsi Ohre u Stirn mit Fett i, dass d Ohre nid rot wärde, d Chopfbedeckig wit abe ids Gsicht zoge, so dass mir gschützt si gäge CHELTI U WIND oder so... Äs si d Seniore unterwägs: Am 1. Tag ä Ufstieg vo 1200m gredi ueche gäge ds Brüsti. I louffe sit jehär mit dere Kategorie, wil die zu mir am beschte passt. Hüt si d Seniore Craks derbi, die beliebte Toureleiter Fritz Zbinden, Peter Tschanz, Peter Zurbrügg und i bi stolz, hüt führt üs a Frou a, d Stefanie Fuhrer. Mitgno het sie no ä Gascht, dr Andreas, u o d Erika, d Rosette u mi. Alli si mit Luscht igstiege i das Steile Stotzige. Ä Bur isch am höie u plouderet ganz gärn mit üs, so chunnt är ou zure chline Pouse.
Niemmert chunnt üs entgäge - niemert überholt üs... Muess säge, mir si doch eifach chli bi de Verruckte... dernäbe louft ds Bähnli heiss, wo derthäre geit, wo mir ou. S git ab und zue Schatte - ja würklich, düre Wald u zwüschinne ä Huch vome Windli. I all däm Komfort mehreri Trinkhalts. Witi schwapt üs entgäge mit Bärgspitze. Irgendwenn hei mir die vom Bähnli igholt. Dr Eltischt vo üs gönnt sich ä Powernuck i dr Gartepolschtergruppe, die andere trinke Kaffee, wo fascht glich würkt... D Stefanie hets im Griff - auf geits, die letschte 300 Höhemeter zur Alp Grat. Oh ä luschegi Unterkunft mitem genau richtige Name. Fröhlichs Triebe mit Chind, Sennehund, bimbelnde Chühe, Gescht. Mir wärde härzlich empfange u überchöme üse Schlafplatz mit farbefroher roter Bettwösch. Und Glück gha, s het Wasser für die verdunschtete Schweisstropfe furt ds schruppe. D Zyt längt zum im Liegistuhel ds ligge, rundume ds luege - ja Uri - urchig wild. Gibelstockhöreli, Chräienhöreli i Sicht. De chunnt Läbe id Sennerei - d Chühe si wit hinde gholt worde zum mälche. Äs igspielts Team vo grosse u chline Chind si mitem Mälcher/Chäser a dr Arbeit - alli miteme Schuss Fröid. Nachem Älplerznacht hocket Max, dr Grossvater vo dr Sennefamilie zu üs u verzellt Spannends us sim Läbe u wie die Alp Grat i de letschte 30 Jahr Form agno het us üs äbe ermüglichet, hie ds übernachte.
Hitzig mit strömendem Liecht toucht d Sunne um 06:53 us dr Bärgchötti uf. Mir warte bis aui parat si u so stöh mir zume winzige Chöhrli zäme u möge vo Härze singe. Vo Frömde ärnte mir sogar Aplous! Alles binenand samt gnüegend Wasser starte mir ernöit ine Tag mit "äquadorähnliche Temperature". D Stefanie kennt vieli Blueme, macht üs ou uf Sälteni ufmerksam u d Alpeflora blüht hie, wie we die nüt vor Trockeheit vo däm Summer wüssti. Uffallend si hür d Silberdischtle, vielsittig offe u schön. No chli ufe - äs choschtet üs alli Astrengig - aber we me i Eggen Surrenepass inegseht, het me doch ds Gfühel vo erreiche. Gratulation - alli hei mirs gschafft - äs grosses grosses Danke ad Stefanie - sie het üs i die Wunderwält vom Pass mit Usblick uf Blackenstock Brunnistock Gitschenhöreli gführt mit viel Rekognoszierigswanderige. Hindeabe het ds wisse Wullegras uf üs gwartet - d Seeli derzue si hingäge ustrochnet gsi. De begägne üs doch no anderi Verruckti - die mit de Bikes. Mir chrüze problemlos. Blackenalp wieder Zwangshalt - mir bruche Dünns u hei dermit wieder Zyt de Tier zudsluege wo schnäll-schnufig umelige oder d Ross wo no ds letschte Gras suber zämerasche. Mit Blick zurück, gö mir aber doch vorwärts. No tschegge mir dr blauwiss Wäg zu dr Spannort-Hütte, äh, äs tüecht mi megastotzig... wenn scho denn scho gloub doch lieber wiss-rot. Und mir chöme ads Ziel Fürenalp. Schweiss und Fröid huscht über üsi Gsichter. Stefanie, eifach Spitze! Merci viel mal. Inge Stauffer