Aspilinde

Dr Wätterbricht cha d Jeudiste nid abhaute sich azmäude.
Z Thun hani die erschte 7 Teilnähmer chönne begrüesse. Ungerwägs si geng meh derzuegstosse u z Lützelflüh si mir 14 Wandervögu gsi, wo im hübsche Kafi Dorfmitti si ga z Startkafi u Gipfeli ha.
Guet gluunt u mit chli, chli blauem Himu si mir richtig Goldbach gstartet. Üse Wäg isch abwächsligswies düre Waud, über Matte u bi schöne Burehüser verbi.
Dr Himu isch de dunkler worde u i ha für d Mittagspouse Räge befürchtet. So hei mir z Ässe chli vorzoge. Bim Kreativ Schöpfli bim aute Schuelhus vo Schwande, hei mir ar Hiubi uf Chiubibänk Gaschträcht übercho. Äs het scho viu vorbereiteti Adväntsgsteck gä z bewundere.
Bi liechtem Nisu simer de zur Aspilinde, dr Dorflinde vom ganze Ämmitau. Ume gschützt si mir witer düre Waud uf d Hammegg, wo mir doch de no hei müesse d Schirme fürenäh. Ussicht hei mir trotzdäm gha bis zu de siebe Hängschte, Hohgant, Schibegütsch..... Vo Gumm hei mir üses Ziel gseh, d Schirme versorget u dr letscht Abstieg i Agriff gnoh.
Z Bigle im Bäre si mir scho erwartet worde. U miteme feine Zvieri hei mir üsi Wanderig beändet. Nacheme abwächsligsriche Tag si mir zfriede heizue gfahre.
Danke für öies Mitcho
Rosmarie Muri