Katzenpfad, Uferwanderung zwischen Niederried und Interlaken West

Bi strahlendem Wätter si 15 Jeudiste nachem Startkafi motiviert los gwanderet.
Dr Brienzersee het i de schönschte blautön glüchtet. Lings u rächts vom Wäg hei d Blüemli üsi Ouge uf sich zoge.
Scho gli hets die erschti Pouse gäh zum öppis trinke u fötele. Christoff het üs ä chline Vortrag gha über z transportiere vom Holz i aute Zyte.
Speter hei mir diräkt am See ä schöne Platz mit Bänkli zum picknicke gfunge. Bir Ruine u Chilche Ringgebärg hets no einisch ä Pouse gäh. Wärs het wöue gmüetlich ha, het chönne höckle u prichte. Wär no meh het wöue luege isch zoberscht uf d Ruine ga ringsum stuhne. Dr witer Wäg het ume viu z luege gäh.
Übere Katzepfad si mir zur Isebahnbrügg u nach Interlaken Ost cho. Ufeme länge Bank hei aui Platz gha für dr Räschte usem Rucksack z trinke. Mir hei ja de no in Interlaken West wöue ga ichehre. Mir hei de die Tour im Runft, nach bim Bahnhof, miteme Schlussdrink u fröhliche Gspräch chönne abschliesse.
Danke, liebi Jeudiste, äs isch schön gsi mit öich.
Rosmarie Muri