Bericht zur Tour
Tärbinder Rundwanderung
Autor
Rosmarie Muri
Erstellt am
09.02.2024 14:17
Letzte Änderung
09.02.2024 18:25
Tourenbericht

Nachere schöne Fahrt iz Heidadorf, hei mir fürne Föifliber chönne Kafi inkl. Gipfeli gniesse.
Mit 19 Wanderkolleginne u Kollege hani die Tour dörfe starte. Die erschte Meter si grad stotzig obsi aber i ha chönne Entwarnig gäh.
Äs isch de schön glichmässig gstiege bis Brunnu, ä härzige Wiler mit gepflegte, brunbrönnte Hüser. Grad dr richtig Platz für e chlini Foto- u Drinkpouse.
Witer isches de bis zum Gärsteruwaud. Dert hei mir bir Brätlisteu ar Sunne ä Versterkig zu üs gno. Munter simer witer ufem zum Teil verischte Wäg miteme Bieferli früsche Schnee druf. Nachere Stung si mir i däm schöne Lärchewaud zure witere Brätlisteu cho, äs schöns Plätzli für üsi Mittagspouse.
Bim Wiler Bodma hei mir z Glück gha, dass sich z Matterhorn zeigt het. Mir hei üs gfröit, dass z Wätter isch besser gsi aus dr Wätterbricht u mir d Ussicht i d Walliserbärge hei chönne gniesse.
Mir si grad zur rächte Zyt in Vispertermine acho füre Fasnachtsumzug z luege. Dank dr rassige Guggemusig, Wy u Chäs hei mir ke Müedigkeit gspürt.
Zfriede u mit ganz viu schöne Idrück hei mir z Heidadorf ume verlah.
Danke liebi SACler, äs isch schön gsi, mit öich ungerwägs z si
Rosmarie Muri