Hasliberg - Brünig Panoramaweg

Das Glück, genau hüt isch dr schönscht Tag vor Wuche.
Nachem Startkafi ufem Haslibärg, hani mit 20 erwartigsvoue SACler dörfe loswandere.
Düre Waud uf isches üs scho z erschtmau warm worde.
Wunderschöni, farbegi Magerwiese si zum bestuune gsi, wie o paar Bärggipfle zwüsche de Wouke obem Roseloui.
Uf d Mittagszyt si mir hungerig bim schöne Badsee acho. Üses Picknick hei mir bim härzige Beizli dörfe gniesse.
D Glägeheit uf Kafi u Haslichueche hei mir üs nid la näh.
Paar Muetegi hei no chönne e Glichgwichtsüebig über d Steine im See mache.
Nachere längere Pouse si mir de witer Richtig Brünig marschiert.
Z grüene, kurve- u abwäslichsriche Stück düre Waud het e schöne Abschluss gäh.
Ufem Brünig si mir vor der Heireis no ga dr Durscht lösche.
Danke liebi Wanderkolleginne u Wanderkollege für dä gmüetlech Tag.
Öii Rosmarie Muri