Aussichtsreiches Gürbental

Z Hoffe u trochnigs Wätter het sich glohnt. Während dr Fahrt vo Thun uf Toffe het dr grau Himu geng meh blaui Lücke übercho.
Z Startkafi hei mir ir Cafe Bar 21 bim Daniel (e SACler vom Wildhorn) gnosse.
Gmüetlech hei mir üs,16 Froue u Manne, ufe Gürbetalerwäg gmacht. Dr flach u breit Naturwäg isch ideal gsi zum usgibig zäme z brichte.
Bis zur Mittagspouse het sich de d Sunne möge düresetze. Z Plätzli het zur Tour passt: ussichtrichs Gürbetal.
Nach dr Sterkig si mir no knapp e Stung bis Seftige gloffe.
4 Teilnähmendi hei de z Angebot agnoh, mitem Zug zrügg z fahre.
Z 12er Trüppli isch güetlech dr Hoger uf zur Widerhueb. D Ussicht isch prächtig gsi. Trotz Näbufätze hei mir üses Dreigestirn u no viu meh gseh.
Am Waudrand na, bi Wyssbach verbi, si mir zum Fronholz cho. Bi dere schöne Brätlisteu hei mir no einisch e gsellegi Pouse gmacht.
Mit liechtem Rucksack hei mir dr Räschte unger d Füess gnoh. Bi Entenried düre gäge d Chiuche Uetendorf hei mir no einisch chönne d Ussicht i d Bärge u d Landwirtschaft mit sine junge u aute Tier bewundere.
Im Rössli Uetendorf si mir de üse gross Durscht ga lösche. U dr Gspächstoff isch üs geng no nid usgange.
Danke liebi Kolleginne u Kollege, äs isch geng schön mit öich
Rosmarie Muri